Анима Мунди до Шилегов: Во „Лајка" партиски активисти, немаме доверба во вашите „добри намери"

Анима Мунди, Здружението за заштита на животните, му се обрати јавно на градоначалникот на Град Скопје, Петре Шилегов за ветувањето дека во новото јавно претпријатие Лајка ќе бидат вклучени и невладините организации, а сепак се предложени партиски активисти и членови.

- Немаме ништо против никого, не не изненадува што во управните и надзорните одбори си предлагате и ставате ваши подобни и/или партиски луѓе, но не го ставајте активизмот во уста напразно и лажно! Приказната дека Вардариште е на активистите е манипулација и лага. Ова се некои ваши активисти кои сега прв пат стапнуваат во Вардариште, велат од Анима Мунди.

Велат  нема да дозволат новоформирано здружение со искуство од неполни 2 месеца да биде некакво покритие со кое ќе демонстрирате лажна отвореност кон граѓаните и подготвеност за соработка.

- Нема да дозволиме нечие неискуство, недоволни знаења или дискутабилни намери бидат параван за утрешниот неуспех да биде припишан на граѓанскиот сектор. 
Долгогодишните активисти за права на животните и се единствени кои ја познаваат оваа проблематика и имаат капацитет и ентузијазам да го стават проблемот под контрола а потоа и решат. Тие со сите сили се борат за животните и кога е потребно за нив излегуваат на улица.  Вие одлучивте да демонстрирате сила и ја покажете вашата умисленост дека умеете и знаете се.  Анима Мунди како здружение кое бесплатно ви го стави на располагање своето искуство и знаење го исклучивте свесно и наменски, додаваат од Здружението.

Меѓу предложените членови се Мери Николова, сопругата на Агрон Буџаку, поранешен амбасадор во Франција, а за претседател е предложен Никола Савовски од СДСМ. За членови на надзорен одбор се предложени Фатмир Арифи, Радица Тодоровска Алексовска и Сакип Аџами.

- Жителите на град Скопје немаат време за вашата генерална проба. А ние немаме никаква доверба во Вашите добри намери и будно ќе го следиме секој чекор на надлежните служби кои сте ги поставиле по личен избор. На крајот секој за стореното ќе сноси одговорност, во тоа бидете уверени, завршуваат од Анима Мунди.

Одлуките ќе се најдат утре на гласање.