Хартиените билети заминаа во историјата: Скопјани втор ден се возат само со „Скопска“
По терк на европските системи за јавен превоз, Град Скопје ги укина хартиените билети и плаќањето кај возачот во ЈСП Скопје и сите приватни превозници, а граѓаните имаат можност да купат промотивно „Скопска“ во месец јануари за 150 денари со вклучени 5 бесплатни возења
Само во месец јануари, на сите продажни места и кај возачот граѓаните можат да купат неперсонализирана електронска картичка „Скопска“ со вклучени 5 бесплатни возења. Во наредните месеци на електронската картичка ќе има само 2 бесплатни возења. Овие картички можете да ги надополнувате со најмалку 100 денари, односно најмногу 6000 денари.
Персонализираните електронски картички „Скопска“ се издаваат исклучиво во центрите на ЈСП Скопје и чинат 200 денари, а на нив покрај податоците за сопственикот имаат и фотографија. На овие картички можете да извадите и месечен билет кој со почетокот на оваа година важи во сите автобуси, односно и во ЈСП Скопје и кај приватните превозници.
Корисниците кои не се возат често со градскиот превоз имаат можност да платат едно возење преку мобилен (засега само за корисниците на Телеком, наскоро и за сите други). За едно возење ќе ви бидат наплатени 40 денари од кредитот на мобилниот телефон.
Повеќе информации за „Скопска“ граѓаните можат да најдат на www.skopska.mk
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
