Водата во неколку струшки села не е за пиење

Во дел од градскиот водовод во Струга, како и во селските водоводи во струшкиот регион отсуствува средство за дезинфекција, а водата што ја конзумираат жителите на селата Мороишта и Калишта е микробиолошки загадена, покажаа последните анализи што ги изврши Регионалниот центар за јавно здравје.

- Дел од примероците на вода од градскиот водовод и селските водоводи во Струга земени и анализирани на 1.февруари во селата Мислешево, Мороишта, бензиската станица „Макпетрол“, како и во селото Калишта  покажуваат дека таму не се користи  дезинфекциско средство. Примероците на вода  земени од селата Мороишта и Калишта пак, покажаа микробиолошко загадување, информира директорот на Центарот Атанаско Михаилов.

Како што појаснува тој, примероци на вода од селата приклучени на градски водовод биле земени и во текот на вчерашниот ден при што било констатирано дека концентрацијата на дезинфекциско средство е под минимално дозволената доза. 

- Такви се анализите во селата Мислешево, Долно Татеши и Радолишта. Зголемена матност имаше во водата во селата  Мороишта и Радолишта. Во тек се микробиолошките анализи на овие примероци, додава Михаилов. 

Примероците вода земени денеска од градскиот водовод во Струга како и во руралните водоводи во регионот, според него, се уште се анализираат, а комплетните резултати ќе бидат готови за два дена. 

Анализите од Центарот за јавно здравје како што појаснува  Михаилов, навремено се испраќаат до Агенцијата за храна и Центарот за управување со кризи,за како што вели, понатамошно постапување од страна на инспекциските служби.

- Според информациите со кои располагаме,  од  страна на Агенцијата за храна е издадена  забрана за користење на водата од водоводните системи во селата во струшкиот регион Мислешево, Биџево, Долно Татеши, Велешта, Радолишта и Калишта, информира директорот на Регионалниот центар за управување со кризи Атанаско Михаилов.