Груевски се обрати на работниот состанок со шефовите на Дипломатско-Конзуларните претставништва на РМ

Во Министерството за надворешни работи денеска започна годишниот работен состанок со шефовите на Дипломатско-Конзуларните претставништва на Република Македонија во странство.

Со работниот состанок претседаваше министерот за надворешни работи Никола Попоски, а свое излагање имаше и претседателот на Владата на Република Македонија Никола Груевски. На состанокот присуствуваа и министрите Владимир Пешевски, Беким Незири, Веле Самак, Бил Павлевски, Фуркан Чако, Џери Наумоф, како и директорот на ТИРЗ, Виктор Мизо.  

Министерот Попоски даде осврт на актуелната политичка ситуација и релациите на Р. Македонија со непосредните соседи оценувајќи ги како многу важни, додека евроатлантската интеграција е без алтернатива и приоритет на нашата надворешна политика.

Економската дипломатија останува клучна компонента на македонската дипломатија во насока на привлекување странски инвестиции и креирање на нови работни места, подвлече Попоски.

Македонската дипломатија е способна да дава значителни економски резултати, а индикатор за тоа е и скорешната најава за инвестиција на фирмата CAP-CON, која произведува автомобилски делови, а е минатогодишна иницијатива на Генералниот конзулат во Њујорк.

Попоски најави дека е во план да се постават нерезидентни амбасадори со седиште во Скопје кои ќе покриваат некои земји од интерес за Македонија, а каде што немаме претставништва, во насока на постигнување поголема ефикасност со пониски трошоци. Минатата година бележи и зголемено дипломатско присуство на Република Македонија преку отворањето на три нови амбасади - во Јапонија, во Казахстан и во Обединетите Арапски Емирати.

На амбасадорскиот совет беше презентирана работата и постигнувањата на Шефовите на Дипломатско-конзуларните претставништва. Се направи сеопфатен преглед на сите настани што се случија во изминатата година, и се  дадоа упатства и насоки за планираните активности нa македонската дипломатија за 2015 година.