Јашари го посети затворот во Шутка

Министерот за правда Аднан Јашари денеска  го посети затворот во Шутка каде одблиску се запозна со техничките, санитарните услови и со актуелната општа состојба  во затворот.

Како што соопшти денеска Министерството за правда, Јашари ги посетил сите одделенија  на затворот  за да ја види актуелната општа состојба на ова институција и најавил дека Министерството во соработка со Управата за извршување на санкции  и во иднина  интензивно  ќе работат за да се подобри состојбата  на затворите во Република Македонија.

За време на посетата, министерот Јашари остварил средба со директорот на затворот Александар Ѓеорѓиевски и директорката на Управата за извршување на санкции Лидија Гавриловска.

Директорот Ѓеорѓиевски го известил министерот Јашари за вкупниот број затвореници и на притворените лица, како и за природата на кривичните дела за кои се лишени од слобода.

Тој изјавил дека казните во овој затвор  ги издржуваат само лицата од машки пол кои прв пат извршиле кривично дело и кои се осудени со правосилна пресуда на  казна затвор во времетраење од 3 години,  како и лицата кои се рецидивисти и се казнети до 6 месеци по пресметување на притворот.

Во затворот Скопје - Скопје, стои во соопштението,  се наоѓа и најголемото одделение   и истовремено најбезбедно за извршување на мерката притвор на  целата територија на Република Македонија.