Јолевски и Котески на средба со медицинскиот тим на АРМ во мисијата АЛТЕА

Министерот за одбрана Зоран Јолевски и началникот на Генералштабот на АРМ генерал-потполковник Горанчо Котески остварија средба со медицинскиот тим на АРМ кој во наредните шест месеци ќе учествува во 17-та ротација за мисијата АЛТЕА во Босна и Херцеговина.

Министерот Јолевски, како што соопшти МО, изразил задоволство од досегашната работа на медицинскиот тим на АРМ во мисијата АЛТЕА, при што  нагласил дека од 17-та ротација на АРМ во мисијата  АЛТЕА, очекувал продолжување на успешното претставување на АРМ и беспрекорно извршување на задачите.

Генералот Котески истакнал дека медицинскиот тим на АРМ во изминативе години на најдобар начин ги покажал способностите и интероперабилноста на АРМ во рамки на мисијата на ЕУ, но и оти има дадено огромен придонес во афирмацијата на АРМ и Република Македонија.  

За време на средбата, министерот Јолевски и генералот Котески биле запознаени со работата и задачите на тимот во рамки на мисијата АЛТЕА.

Медицинскиот тим на АРМ ќе биде предводен од капетан Дејана Шврака, а  составен е од 10 лица, стручен медински и помошен персонал, чија задача во рамки на мисијата АЛТЕА е обезбедувањеопшта медицинска помош за потребите на силите на ЕУФОР, кои се сместени во кампот Бутмир кај Сараево.

По повод упатувањето на 17-та ротација на АРМ  во   мисијата АЛТЕА, денеска пред командата на бригадата за логистичка поддршка на АРМ ќе се одржи пригодна свеченост.