Кузмановска: Разочарување за илјадници студенти - „Кузман Јосифовски-Питу“ останува затворен, студентскиот оброк замрзнат

Потпретседателката на Социјалдемократската младина на Македонија (СДММ), Стефанија Кузмановска, денеска ја критикуваше Владата на ВМРО-ДПМНЕ и министерката за образование, Весна Јаневска, за нивната неспособност и неисполнети ветувања кон студентите. Според Кузмановска, и оваа академска година започнува со разочарување за илјадници студенти.

Кузмановска истакна дека Конкурсот за прием на студенти во студентските домови не е објавен за сите домови, а студентскиот дом „Кузман Јосифовски - Питу“ останува затворен. Ова се случува и покрај минатогодишните ветувања на министерката Јаневска дека домот ќе биде реновиран и подготвен за вселување до октомври 2025 година.

„Лани во октомври министерката Јаневска ветуваше дека оваа академска година студентите ќе влезат во реновираните домови во Скопје. Но, и ова ветување како и сите други на ВМРО-ДПМНЕ се само празни зборови. Година дена подоцна, ништо од тоа! Студентскиот дом Кузман Јосифовски Питу останува затворен, а студентите принудени сами да бараат скапо приватно сместување“, изјави Кузмановска.

Таа ова го нарече „класичен пример за неспособност и лажно ветување“, додавајќи дека нема ниту услови за сместување, ниту хигиена, ниту достоинствен живот за студентите, туку само празни зборови и уште една загубена академска година за младите.

Потпретседателката на СДММ нагласи дека за ВМРО-ДПМНЕ не се важни студентите и нивните потреби. Таа посочи дека власта не ги продолжува ниту добро воспоставените мерки од СДСМ, како што е студентскиот оброк.

„Министерката Јаневска во опозиција ја критикуваше мерката за студентски оброк дека била „мизерна поддршка“. А денес? Истата таа Јаневска не само што не го зголеми студентскиот оброк, туку дури и го замрзна неговото покачување, и покрај предлозите за зголемување во Собранието. Ветуваа подобар студентски стандард, а носат само апатија, разочарување и празни мензи“, рече Кузмановска.

Кузмановска порача дека младите Социјалдемократи ќе продолжат да се борат за правата на студентите, бидејќи она што го бараат не е луксуз, туку неопходност и основни услови за секој студент.

„Младите заслужуваат повеќе од лажни ветувања и неисполнети рокови. Студентите не се статистика во предизборни програми – тие се иднината на оваа земја. СДСМ ќе продолжи да се бори за студентски права, за квалитетни услови за живеење и учење, и за достоинствен живот на младите во Македонија“, заклучи Стефанија Кузмановска.