Кадиров: Побарав од Путин да ме разреши, време е за промени

Лидерот на Чеченската Република, Рамзан Кадиров, изјави дека побарал од рускиот претседател Владимир Путин да го разреши од должноста, среде шпекулациите дека здравствените проблеми наскоро би можеле да го принудат да се повлече.

Кадиров (48) стана шеф на Чеченија во 2007 година, откако беше назначен на таа позиција од рускиот претседател Владимир Путин. Според „Новаја Газета Европа“, Кадиров се подготвува да му ја предаде власта на својот 17-годишен син Адам. „И јас ги слушнав тие гласини. Тие пишуваат секакви работи“, рече Кадиров како одговор на објавите, објави владиниот портал „Чеченија денес“.

„Напротив, јас лично побарав да бидам ослободен од моите должности. Оној што ќе дојде, ќе има свои иницијативи, своја визија. Се надевам дека моето барање ќе биде прифатено“, додаде тој.

Ова не е прв пат Кадиров да зборува за повлекување. Во 2017 година, во телевизиско интервју, тој рече дека тоа ќе биде негова „животна желба“. „Тогаш беше потребен човек како мене да се бори, да воведе ред“, изјави тој за „Росија 1“ во тоа време, според Ројтерс. „Сега имаме ред и просперитет и време е за промени во Чеченската Република.“