Филипче: Криминалот е двојно зголемен, граѓаните живеат во страв - нема ништо гордо во тоа

За една година владеење на ВМРО-ДПМНЕ и ЗНАМ, Македонија не само што е економски осиромашена, туку и сериозно небезбедна. Се живее со страв, институциите се политизирани, а правдата е селективна. Ова го порача Венко Филипче на трибината „Македонија понижена – Една година Влада“.

– По однос на безбедноста, јасно му е на секој граѓанин на оваа држава дали е сега подобро или не. За една година од оваа власт ни се случи најголемата трагедија во модерната историја на Македонија. Трагедија која можела да биде спречена доколку полицијата редовно и чесно си ја вршела работата, рече Филипче.

Тој истакна дека Министерството за внатрешни работи е целосно партизирано и нефункционално, додека криминалитетот експлодира.

– За жал, полицијата денес, по една година, е претворена во партиска војска на Мицкоски и неговата партија. Општиот криминалитет е зголемен речиси за половина – и тоа според нивните статистики. Секојдневно гледаме убиства, пукања, трагични сообраќајни незгоди. Безбедноста на граѓаните е загрозена како никогаш досега, посочи Филипче.

Наместо фокус на заштита на граѓаните, МВР, според него, се занимава со сомнителни набавки и изборни игри.

– За цело тоа време, МВР се занимава со набавки на униформи од фантомски фирми, набавка на нови возила, нови системи за прислушување, а сега – најново – ќе го менуваат и системот за лични документи, баш пред избори, рече Филипче.

Тој потсети на ветувањето на Тошковски и Мицкоски дека „и брат да ми е – ќе одговара“, но посочи дека тоа важи само за камерите, не и во реалноста.

– Иако Тошковски и Мицкоски ветуваа дека „и брат да ми е ќе одговара“, гледаме дека кога станува збор за брат на градоначалник на ВМРО-ДПМНЕ – за него нема казна за брзо возење.

 Нема постапки за десетици криминални тендери, нема постапки за актуелни функционери, заклучи Филипче.