Дедо земал погрешно дете од градинка - наставничката суспендирана

Неверојатен инцидент се случил во градинка во Сиднеј, каде што дедо погрешно го зел и однел дома туѓото дете, што предизвикало итна истрага од страна на надлежните органи. Во понеделник попладне, човекот дошол да го земе својот внук од градинката во јужното предградие Бангор, и наместо тоа, однел дома друго момче кое спиело во затемнета соба.

„Само ми рекоа дека носел шорцеви“

Грешката била откриена дури кога мајката на едногодишното дете кое било однесено дошла да го земе своето дете и сфатила дека го нема.

- Не можам да го опишам чувството, сè уште сум во шок - рече жената која сакаше да остане анонимна

- Не можеа да ми го кажат името на човекот, не можеа да ми кажат кој е или кого требало да го земе. Не можеа да објаснат како изгледал, освен дека носел шорцеви и дека бил постар господин - рече шокираната мајка.

Иако центрите за грижа за деца имаат строги безбедносни протоколи според кои децата можат да ги земат само родители, старатели или овластени лица за нега, мајката нагласи дека не го обвинува дедото за грешката.

- Не сме лути на него. Не сме вознемирени на него - ја обвинуваме градинката - рече мајката.

Сопругата на дедото кој ги заменил децата рекла дека нејзиниот сопруг бил „скршен“ и дека тој „ја преземал одговорноста за грешката“.

- Кога сфатил дека не го зел нашиот внук, туку туѓо дете, веднаш го вратил - додаде жената.

„Први чекори“ потврдија за Би-Би-Си дека наставничката вклучена во инцидентот е суспендирана.

„Искрено им се извинувам на семејствата за овој инцидент“, изјави директорката на градинката, Триша Хасти. Таа рече дека тоа никогаш порано не се случило и дека тие ги засилиле процедурите за „да се осигурат дека никогаш повеќе нема да се случи“.

Во тек е истрага за „длабоко загрижувачкиот и сериозен инцидент“. Инцидентот доаѓа во време на зголемен јавен надзор врз безбедноста во австралиските градинки, по објавувањето на законските измени за подобрување на безбедносните стандарди минатиот месец.