Целодневна настава до петто одделение: Министерката Јаневска најави доградба на 25 училишта ова лето

Фокусот на Министерството за образование и наука е ставен на обезбедување квалитетни и достапни учебници, дигитализација на образовните процеси, подобрување на инфраструктурата и постепено воведување на целодневна настава за учениците од прво до петто одделение, вели министерката за образование и наука, Весна Јаневска, најавувајќи конкретни чекори за интеграција на вештачката интелигенција во наставата, како и законски измени во високото образование.

Јаневска, во вечерашното гостување на телевизија Сител, направи пресек на реализираните активности и најави нови реформи во образовниот систем. Од реализираното ги издвои дигитализирани процеси и услуги во министерството, дигитализирани услуги за учениците и студентите и склучените меморандуми за соработка со универзитети, невладини организации и странски институции.

Министерката потврди дека учениците ќе добијат учебници по сите предмети, вклучително и странски јазици. 

-Учебници дека ќе има по сите предмети, вклучително и странски јазици. Ќе има делумна промена на концепцијата, интегрираните предмети ќе бидат раздвоени, ќе има нови наставни програми, нови учебници за седмо одделение, рече таа.

Во делот на вештачка интелигенција, истакна дека во соработка со Универзитетот во Битола, ќе се изработат водичи за наставници и ученици за користење на ВИ со креативно размислување.

-Воведуваме и вештачка интелигенција во образованието, интерактивни учебници и насоки за вештачка интелигенција во регионалните центри, изјави министерката.
 
Јаневска најави дека се работи на воведување целодневна настава за учениците од прво до петто одделение. За таа цел, како што рече, ова лето ќе започне доградба на 25 училишта.

-Сакаме од прво до петто сите ученици да одат во целодневна настава. Ова е процес што ќе се одвива во следните четири години, рече таа.
 
Во врска со иселувањето на околу 17.000 ученици, таа потврди дека е тоа така, но посочи дека има и општини со зголемен број на ученици.

-Мрежата ќе се оптимизира – таму каде што има по пет ученици, ќе се затвораат училишта, но во Аеродром, Кисела Вода и Чаир ќе се градат нови, истакна Јаневска.
 
Информираше дека министерството е при крај со новиот Закон за високо образование, како и со законите за научно-истражувачка дејност и иновации.