Православниот храм „Свети 40 Маченици во Севастеја“ се наоѓа на живописната обала на Смилковското Езеро, на локацијата позната меѓу мештаните како Кршиколе, односно Крст. Овој свет објект е сместен во близина на скопската заобиколница, во рамки на Општина Гази Баба, и претставува место за молитва, тишина и сеќавање.

Црквата е подигната како вечен спомен на петте млади животи кои трагично згаснаа во настанот кај Смилковско Езеро, а нејзината изградба претставува симбол на надеж, солидарност и духовна поддршка за нивните семејства и за целото општество.

Во рамки на дворот на црквата, Општина Гази Баба, во соработка со општествено одговорна компанија, изгради и постави свет крст – силен верски и културен симбол кој го надополнува светото значење на овој простор.