Врховниот суд со анализа на работата на судовите: Потребни се нови судии и подобри услови

Врховниот суд на Република Северна Македонија ја заврши анализата на извештаите за работата на судовите низ државата за 2024 година, при што беше оценета ажурноста и квалитетот на судската работа. На проширената Општа седница беше посочено дека дел од судовите покажале солидни резултати, но загрижувачки е фактот што некои судови не успеале да го совладаат приливот на нови предмети, со што се зголемил и заостатокот на нерешени случаи

Вршителот на должност претседател на Врховниот суд, д-р Џемали Саити, нагласи дека оценките и заклучоците што произлегуваат од оваа анализа се дел од спроведувањето на принципите на самостојност и независност на судската власт и обезбедување правна сигурност за граѓаните.

„Потребно е итно пополнување на судовите со нов кадар, како и унапредување на материјалните и финансиските услови за работа“, се наведува во заклучоците од седницата. Според Врховниот суд, намалениот број судии претставува сериозен проблем за ефикасноста на судството.

Дополнително, беше нагласена и потребата од континуирана едукација на судиите, како и финансиска независност на судската власт, што се смета за клучен предуслов за натамошно унапредување на правосудниот систем во земјата.