МЖСПП: Започна прва фаза од реконструкцијата и замената на главната водоводна мрежа во Струга

Министерството за животна средина и просторно планирање информира дека е започната првата фаза од реконструкцијата и замената на главната водоводна мрежа од азбестни цевки во градот Струга. Реконструкцијата, како што е најавено, ќе трае 12 месеци и ќе опфати 6,2 километри водоводна мрежа, вклучително и главната улица и 13 краци низ урбаниот дел на Струга.
 
Првиот потпретседател на Владата и министер за животна средина, Изет Меџити, како што информираат од неговиот кабинет, на настанот за отпочнување на реконструкцијата, истакнал дека овој проект претставува значаен чекор во насока на заштита на јавното здравје и подобрување на условите за живот на граѓаните.
 
-Само во првата фаза ќе се инвестираат околу 90 милиони денари, односно 1,5 милиони евра, со кои ќе се подобрат хигиенските услови и ќе се намали ризикот од штетни азбестни влакна. Оваа интервенција е дел од нашата стратешка заложба за здрава животна средина, изјави министерот Меџити.