ФОТО: Демир Хисар го подготвува теренот за поројните дождови

По интервенциите што изминативе денови беа направени на неколку локации долж регионалниот пат Демир Хисар – Кичево, механизацијата денеска беше ангажирана на расчистување на испустен канал кај мостот на Стара Река во населбата Мургашево, како и расчистување на дел од коритото пред мостот.

Од општина Демир Хисар соопштуваат дека со овој зафат значително се проширило коритото на реката, а се подобрила и пропустливоста на мостот.

-Механизација работеше и на проширување и чистење на коритото на Суводолица пред сливот во Стара Река како превентивна мерка од преливање на водата по нивите и можно поплавување на куќите што се наоѓаат од десната страна на реката, се вели во соопштението.

Од општинскиот Кризен штаб соопштуваат дека за време додека траат прогнозите од обилни врнежи од дожд, во работна готовност ќе бидат неколку градежни машини и теренски возила.