Започна вакцинација против беснило кај кучињата во кумановско
Надлежните од Ветеринарно сточарскиот центар „Тодор Велков“ информираат дека навреме е започната вакцинацијата против беснило кај кучиња и мачки во општините Куманово, Липково и Старо Нагоричане.
Од Центарот формирале екипи кои ги вакцинираат домашните миленици во селата, приградските населби и градот.
- Екипите од Центарот ја спроведуваат вакцинацијата по одделни реони. Сопствениците веќе се запознаени дека треба навреме да ги вакцинираат кучињата. Добар дел од сопствениците се мошне ревносни и самите доаѓаат во центарот и ги вакцинираат кучињата, вели ветеринарниот лекар Димитар Венев од Центарот „Тодор Велков“.
Според проценките на стручните служби од Ветеринарниот центар со вакцинацијата треба да бидат опфатени помеѓу 1.500 и 2.000 кучиња.
Цената за вакцинација против беснило, што освен вакцина вклучува и таблети против паразити е иста на државно ниво и изнесува 500 денари. Вакцинацијата е редовна и се спроведува секоја година во периодот од јануари до мај.
Оцени ја веста
10.01.2015 - 15:19
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
