Иванов - Давутоглу: Традиционално пријателство и партнерство во сите сфери

За натамошно продлабочување на  соработката меѓу Македонија и Турција разговарале попладнево претседателот Ѓорге Иванов и турскиот премиер Ахмет Давутоглу, кој денеска престојува во Скопје. 

Како што соопшти Кабинерот на Претседателот на РМ, соговорниците изразиле задоволство од традиционалното пријателство и партнерство  и од интензивната комуникација и соработка во сите сфери од заеднички интерес, оценувајќи дека тие се  потврда за одличните односи меѓу двете држави. 

 - Изразувајќи благодарност за цврстата и принципелна поддршка на Република Турција во однос на нашите стратешки цели, членството во Европската унија и во НАТО, претседателот Иванов нагласи дека Република Македонија високо ги цени турските активности и напори по овие прашања. Македонскиот претседател и турскиот премиер ја поздравија економската соработка, која е највисоко на агендата на меѓусебните односи, со очекување за натамошно интензивирање. Беше разговарано и во однос на соработката во сферата на одбраната и безбедноста, културата, туризмот, образованието, како и на мултилатерален план во меѓународните организации, информира Кабинетот на Иванов. 

Македонскиот претседател во тој контекст изразил очекување за зајакната соработка во рамките на Алијансата на цивилизациите - иницијатива на Обединетите нации во која Турција е земја-основач.

- Претседателот Иванов и премиерот Давутоглу  разменија мислења и информации за состојбите во регионот, за прашањата од надворешно политички интерес за двете земји, и разговараа за потребата од поголема соработка меѓу безбедносните служби на Република Македонија и на Република Турција, во поглед на соочување со заканата од странските терористички борци, соопшти Кабинетот на Иванов. 

 Давутоглу истакнал дека Македонија е важен пријател и партнер на  Турција и дека, како и досега, и во иднина може да смета на нивната безусловна поддршка и помош. - Додаде дека нашата држава со својот модел на соживот претставува позитивен пример не само во регионот, туку и многу пошироко, соопшти Кабинетот на Претседателот на РМ за средбата на Иванов со турскиот премиер Давутоглу.