Седумдесетгодишнина од основањето на Народниот театар во Битола

Народниот театар во Битола е институција која претставува врвен домашен и меѓународен репрезент на вредностите на македонската култура. Од 1944 година до денес во НУ Народен театар-Битола се одржале 500 премиерни изведби, а изведени се повеќе од 12.000 претстави кои ги гледале близу пет милиони вљубеници во театарот.

Ова синоќа во Народниот театар во Битола го истакна министерката за култура Елизабета Канческа-Милевска на промоцијата на фотомонографијата „Нови хоризонти“, објавена по повод одбележувањето на 70-годишнината од постоењето на таа национална театарска установа и изведбата на првата театарска претстава на македонски јазик во Република Македонија.

- Денешниот свечен чин има респективна културолошка референца - тој ја маркира 70-годишнината од првата одиграна претстава на македонски јазик во далечната 1944 година, кога доајените на македонското глумиште Јорго Цаца, Вера Вучкова, Мери Бошкова, Димче Стефановски и Ацо стефановски и многу други, ентузијастички творејќи во театарската група на битолската воена област најавија амбициозна намера, градот на конзулите да промовира врвен театар, рече Канческа-Милевска.

Таа посочи дека е убедена оти сцената на Битолскиот театар и во иднина ќе биде местото каде ќе се создаваат новите успеси на македонскиот театар, местото каде актерите, режисерите, творци и уметници ќе продолжат да ја испишуваат македонската театарска историја.

Фотомонографијата „Нови хоризонти“ ја промовираше режисерот Дејан Пројковски, а за големиот јубилеј на театарот во Битола говореа директорот Валентин Светозарев, режисерот Љубиша Ѓоргиевски и битолскиот градоначалник Владимир Талески.

На сцената на театарот во Битола беше изведена роденденската театарска претстава „Нови хоризонти“ во која настапија вработените во таа национална установа.