„Ќе оздравам за своите деца" - исповед на докторката од Штип која се бори за живот

Докторката Евица Бојаџиева од Штип има само 34 години, а веќе две години е во костец со ракот на жолчните канали - една од најретките болести на светот. Болеста е ретка и тешка, се јавува кај едно лице во сто илјади.

Во интервју за Дневник таа вели дека заради своите две деца има неверојатна желба да се бори за сопствениот живот и да оздраве, а потоа сака да им помогне на сите други болни.

- Една зима почувствував болки во рамото, но сметав дека не е ништо страшно. Доев, па мислев дека е поради тоа што го држам детето в раце. Но, болката се префрли во грбот, па помислив дека е напад на бубрег. Отидов на лекар, кај моја колешка, докторка, да се прегледам на ехо. Тогаш првпат сама си ги видов метастазите. Докторка сум и точно знаев што гледам. Не паничев, решив да испитам се и да се борам. Мојот најголем мотив ми се децата, за нив ќе оздравам, вели Евица за весникот. 

За неколку дена патува за Kина, оти „Ренканг болницата” во градот Донг Гуан е единствена болница во светот што на Евица и дава надеж дека ќе и помогне во борбата да се излекува и дека со своите деца здрава ќе шета по штипските сокаци. 

Третманот што го нудат во болницата е одобрен од реномирани светски здравствени организации. Се применува терапија што е комбинација од лекување со озон, соно-фотодинамична терапија или зрачење на канцерогените клетки, хемотерапија, но и лекување со традиционална кинеска медицина со билки. За да доде до здравје, потребни и се 120 илјади американски долари, кои таа ги нема, пишува Дневник. 

- Ова е многу е специфична и ретка болест. Изгубив многу време додека ја дијагностициравме. Ги исцрпев сите можности за лекување. Речиси на нозе ги издржав неподносливите хемотерапии, боцкањата, тестовите и страшните бодежи од болка. Сите напори за да се стопира болеста, да се направат операции во Словенија, Германија и во Италија, беа залудни, болеста се ширеше многу бргу. Сега веќе имам метастази на белите дробови и коските. Многумина колеги дигнаа раце од мене, дури ми кажаа неубави работи. Но, јас знам со што се борам и знам зошто. За децата вреди и светот да се сврти. Една вечер додека имав страшни болки, кога многумина ја веднеа главата пред мене, јас се скршив и решив на „Фејсбук“ да ја споделам мојата мака и да побарам помош. Знам дека пари за лекување им се потребни и на многу други, но да се вратам од Kина јас ќе помагам, вели Евица. 

Целата сторија за оваа храбра жена, прочитајте ја на ДНЕВНИК