Николоски со супер вест: Скопје директно го поврзуваме со Париз

Александар Николоски, македонскиот министер за транспорт и врски, денеска се огласи на Фејсбук каде сподели убава вест.

- Скопје директно го поврзуваме со Париз, од денеска нова авионска линија Скопје-Париз (аеродром Орли). Од денеска, Скопје и официјално директно се поврзува со Париз преку новата авиолинија Скопје - Париз. Утрово на Меѓународниот аеродром Скопје се реализираше првиот лет од Париз и тоа од аеродромот Орли до Скопје на авиокомпанијата Изиџет. Линијата ќе се реализира два пати неделно и истата е воведена како резултат на финансиската поддршка што ја овозможи Владата преку Министерството за транспорт преку Програмата за воведување на нови дестинации. Ова е уште една можност за подобра комуникација и поврзување на Македонија со европските земји и европските метрополи. Како Влада создаваме услови со кои привлековме нови авиокомпании во Македонија и резултатите веќе се видливи, напиша тој.

Од ТАВ Македонија велат дека со оваа нова авиолинија, патниците на скопскиот аеродром ќе имаат бенефит да патуваат на еден од најфреквентните аеродроми во Франција кој нуди бројни домашни и европски летови.

„Изи џет“ влезе на македонскиот пазар во ноември 2021 година.

Покрај „Изиџет“, авиолинија од Скопје до францускиот главен град опслужува и авиокомпанијата „Визер“ до аеродромот „Бове“ оддалечен 90-тина километри од Париз.

Со летниот распоред на летање што стапи во сила викендов, од Скопскиот аеродром оперираат 16 авиокомпании до 47 редовни дестинации, а три  сообраќаат со 10 чартер летови.