Келог: Конфликтот во Украина е на работ на примирје

Специјалниот пратеник на американскиот претседател Доналд Трамп за Украина и Русија, Кит Келог денеска изјави дека конфликтот во Украина е на работ на прекин на огнот, но дека двете страни мора да постигнат договор.

-Верувам дека можеме да го постигнеме. Искрено верувам дека сме на работ на прекин на огнот, но двете страни ќе мора да постигнат некаков договор. Ниту една страна нема да добие се што сака, изјави тој за Фокс њуз.

Келог истакна дека Трамп е „вознемирен“ од акциите на двете страни, но дека САД имаат намера да бараат целосен прекин на огнот.

-Сакаме сеопфатен прекин на огнот од 30 дена. Штом ќе го постигнете ова, ќе биде многу тешко да ја започнете војната повторно. Тоа е она што јас верувам. И ние треба да добиеме листа со услови, што јас би го нарекол список на услови. Тоа го сакаат Русите. Тоа го сакаат Украинците, рече Келог.

Минатата недела рускиот претседател Владимир Путин телефонски разговараше со Трамп, кога, меѓу другото, рускиот лидер позитивно одговори на идејата страните во конфликтот во Украина 30 дена се воздржуваат од меѓусебни напади врз објектите на енергетската инфраструктура и на војската и дал соодветни инструкции.

Овој предлог го прифати и украинскиот претседател Володимир Зеленски, но оттогаш двете страни вршат напади врз енергетските капацитети на противникот.