Јелена се спаси од пожарот во Кочани: Преживеав благодарение на херојот Јован

Јелена Арменска која се врати од лекување во Шпанија по страшниот пожар во дискотеката "Пулс" во Кочани, во кој за жал загинаа 59 лица, раскажа за хоророт кој го доживеала кобната ноќ на 16. март и за својот другар, херојот Јован Костадинов од Виница, кој ја спасил.

За орталот "Делчево365", младата Јелена ја раскажа својата потресна приказна.

– Хероите, пожарникарите, обезбедувањето и полицајците максимално се трудеа да ги извадат луѓето од дискотеката. Во првите 10 минути бев свесна, потоа изгубив свест. Преживеав благодарение на мојот другар Јован. Се лекував на Токсикологија, потоа на Карил и потоа во клиниката „Ла Пас“ Мадрид во Шпанија. Таму бев една недела, беше страшно, имаше повредени на кои им беа правени операции на пластична хирургија. За среќа, имало господ, јас и моите две другарки сме живи и здрави, се спасивме. 

Јелена беше пречекана во нејзиното уичилиште ОСУ С„Ацо Русковски“ во Берово.

Јован Костадинов, 19-годишното момче од Виница, кое стана симбол на храброст и несебичност откако спаси 21 лице од пламените јазици, ја раскажа својата потресна приказна за кобната ноќ за „Супорт Кочани“. 

Викотници и пискотници на кои никој не сака да се потсетува“ – така го опишува тој моментот кога, соочен со хаосот и паниката, ги вадел луѓето на сигурно. Во еден миг, поради истоштеност и вдишување на густ чад, Јован паднал на колена. Иако физички исцрпен и со намален здив, не престанувал да помага.

- Во еден момент почувствував дека ми се слошува и не можев повеќе да стојам. Со уште двајца повредени успеавме да се добереме до возило кое нè однесе во болницата во Кочани. Таму веќе беше хаотично – лекари, повредени, семејства… никој не знаеше што се случува и колку е сериозна состојбата“, сведочи Јован.

Мајка на едно од повредените момчиња, Јадранка Бреслиева, се огласи на социјалните мрежи и ја сподели приказната за момчето херој.

- Со голема благодарност и емотивна почит, би сакал да го споделам херојскиот чин на Јован Костадинов од Виница, кој не само што ги спаси животите на 21 деца во трагичната несреќа во ноќниот клуб во Кочани, туку го спаси и мојот син. Во најтемните моменти на паника и хаос, кога сите беа збунети и во страв, Јован се појави како светлина на надеж. Без да размислува, го зеде мојот син кој беше под рушевините  на дискотеката  и  го носеше на својот грб низ огнот и чадот, се до болницата во Кочани, со цел да го спаси, додека сите наоколу бегаа и се бореа за својот живот, напиша мајката.

Вели Јован е вистински херој – младо момче со големо срце и неописива храброст, кој го ризикуваше својат живот  за да спаси туѓи животи.

- Јован на тебе  ти го должам новото утре, новата насмевка, новата надеж и новиот живот на мојот син. За тебе нема зборови кои можат да го искажат моето благодарност и почит.  Благодарност од дното на срцето. Ти ми го даде најголемиот подарок што може да го добие една мајка, го спаси животот на  моето дете. Ти  ќе останеш засекогаш во моите молитви и во нашите срца, напиша таа.

Јован беше пречекан со овации и аплауз во гимназијата „Ванчо Прќе“ во Виница.