Обвинителството на БиХ формира тим за апсење на Додик и други функционери

Обвинителството на Босна и Херцеговина формираше тим кој разработува активности за апсење на претседателот на Република Српска (РС) Милорад Додик, претседателот на Народното собрание на РС Ненад Стевандиќ и премиерот на ентитетот Радован Вишковиќ, пренесе Бета повикувајќи се на локални медиуми.

Судот на БиХ по нив распиша централна потерница откако не одговориле на повикот да бидат сослушани како осомничени во истрагата за „напад на уставниот поредок на БиХ“.

Сараевскиот портал „Рапорт“ јави дека тимот го сочинуваат членови на Агенцијата за истрага и заштита на БиХ (СИПА), Граничната полиција на БиХ и Агенцијата за разузнавање и безбедност (ОБА) и дека тимот веќе двапати се сретнал.

Тој тим, се додава, прво има задача да ги расветли сите околности поврзани со преминувањето на границата на Додик откако по него е распишана централна потерница, како и „до крај да дефинира кој, како и кога да се приведат Додик и другите осомничени за нападот врз уставниот поредок на БиХ по потерница на Судот на БиХ“.

Според извештаите, Додик во два наврати илегално ја напуштил Босна и Херцеговина и се вратил.