Напад врз студенти во Нови Сад: на студентка и била изместена вилицата

Студенти кои учествуваат во блокадата на Филозофскиот факултет во Нови Сад соопштија дека синоќа биле нападнати, при што неколкумина од нив се повредени, пренесува 021.рс.

Нападот, според нивните наводи, се случил околу три часот наутро.

„Една студентка е тешко повредена и моментално се наоѓа на лекување во Клиничкиот центар во Војводина. Има изместена вилица и повреди на телото. Неколку ученици се здобиле со полесни повреди, а лекарите во моментов ја проценуваат нивната состојба“, се вели во изјавата на студентите на Филозофскиот факултет.

Тие додадоа дека четворица мажи, вооружени со безбол палки, нападнале група студенти кои ставале налепници и цртале шаблон со порака „Три месеци, три моста“. Оваа порака е поврзана со најавената блокада на три моста во Нови Сад, закажана за сабота на 1 февруари, точно три месеци по уривањето на настрешницата на Железничката станица во Нови Сад.

„Студент и студентка од Медицинскиот факултет залепиле налепница на корпа за отпадоци пред просториите на СНС, по што двајца непознати мажи со силна градба и кратка коса излегле од просториите на СНС и го нападнале младиот човек. Еден од нив го фатил за јака и почнал да го гуши. Студентката успеала да го сними инцидентот, но напаѓачите и го зеле мобилниот телефон и ја избришале снимката. Студентите успеале да побегнат, но напаѓачите набрзо се вратиле и почнале да ги бркаат, прво пеш, а потоа со автомобил, при што за малку ќе удреле двајца студенти“, се вели во соопштението на студентите.

Според дополнителните наводи, истите двајца мажи, заедно со уште двајца со безбол палки, нападнале друга група студенти во близина на основно училиште.

„Во таа прилика и нанеле тешки телесни повреди на една студентка. Ја тепале со тупаници и клоци. Останатите студенти успеале да избегаат со полесни повреди“, заклучуваат студентите.

Од Клиничкиот центар на Војводина за 021.рс потврдиле дека дијагностиката за тешко повредената студентка се уште е во тек.