Царинска управа на петто место во спроведување политики за интегритет

Царинската управа се најде на петтото место во спроведување на политики за интегритет на ранг листата од 72 институции, или за едно место понапред во однос на 2023 година, покажува најновиот извештај за имплементација на интегритет за 2024 година на Државната комисија за спречување на корупцијата. Во извештајот за 2023 година Царинската управа беше на шестото место во спроведување на политики на интегритет.

Од Царинската управа денеска соопштија дека ДКСК забележале подобрување во делот на идентификувани ризици од корупција и зголемени контроли со цел нивно превенирање, преземени конкретни чекори во делот на спречување на судир на интереси, меѓу кои и изречени дисциплински за царински службеници кои постапувале надвор од овластувањата. Подобрувања, посочуават, се забележани и во делот на транспарентноста.

Според Царината, поголемата професионалност и интегритет при извршување на работните задачи,  минатата година резултирале со поголема наплата на приходи во Буџетот и во втората половина од годината биле наплатени милијарда евра, бројот на случаи за заплени бил зголемен за 63 проценти, а на кривични пријави за повеќе од три пати.

Во 2024 година се евидентирани  410 случаи на заплени при откриени прекршочни и кривични дела при што 305 случаи се евидентирани во втората половина од годината. До Основното јавно обвинителство во 2024 година биле поднесени и вкупно 89 кривични пријави, против 46 правни лица и 122 физички лица, при што во втората половина од годината се поднесени 69 кривични пријави за 37 правни и 101 физичко лице.  За споредба во втората половина од 2023 година беа поднесени 20 кривични пријави.