Пентагон: Нашите сили остануваат во Сирија

Пентагон денеска соопшти дека САД ќе го задржат своето присуство во источниот дел на Сирија и ќе преземат соодветни чекори за да го спречат обновувањето на терористичката група „Исламска држава“.

Заменик-помошникот на секретарот за одбрана за Блискиот Исток, Даниел Шапиро, повика на заштита на цивилите, особено на малцинствата и на почитување на меѓународното право, пренесува Скај Њуз.

Американскиот амбасадор Роберт Вуд минатата недела изјави дека американските воени позиции и персонал во североисточна Сирија остануваат критични за да се осигура дека ИД никогаш повеќе нема да може да се крене. Американски војници се стационирани и во сирискиот гарнизон Танф во близина на граничниот премин Јордан и Ирак, каде што ги поддржуваат сириските бунтовнички сили во спротивставувањето на Исламската држава во областа.

Владата на Асад ги гледаше американските сили како окупатори. Околу 900 американски војници моментално се во земјата, главно на североисток.